Denne artikkelen er over 1 år gammel og kan innehold utdatert informasjon
«Snakke-robot» hjelper med kommunal informasjon
Kommune-Kari kan svara på mykje, og skal fungera som eit supplement til servicekontoret på kommunehuset.
Publisert 10.06.2022 10.55
Sist endra 10.06.2022 12.06
I mai månad har det dukka det opp eit nytt ikon på Austevoll kommune sine nettsider. Det er Kommune-Kari, ein såkalla chatbot som i følgje utviklarane aldri vert lei av å svara på innbyggjarane sine spørsmål, jobbar døgnet rundt og vert smartare for kvar dag som går.
Kommune-Kari er allereie «tilsett» i mange kommunar rundt om i landet, og dei siste månadene har Austevoll fått opplæring i den nye tenesta. Chatte-roboten, eller «snakke-roboten», nyttar kunstig intelligens for heile tida å svara betre på spørsmåla som vert stilte. Jo meir ho vert brukt, jo meir treffsikker vert ho. Dei tilsette på servicekontoret til Austevoll kommune har skaffa seg ekstrahjelp i form av ein «snakke-robot». Den nye tenesta skal fungera som eit supplement, og ikkje som ei erstatning for servicekontoret.
Kommune-Kari skal vera ei ekstrahjelp og gjera det enklare for folk å finna informasjonen som ligg på kommunen sine nettsider og andre relevante nettsider. I databasen til Kommune-Kari ligg det inne over seks tusen svar.
No har det vore opp til oss å skriva inn informasjon og lenka det heile opp mot nettsida til kommunen og andre eksterne nettkjelder. Det er ikkje alt som er heilt på plass enno, så vi må framleis justera litt.
I tillegg til å gje informasjon om kommunale tenester, søknadsfristar og opningstider, kan Kommune-Kari hjelpa med meir generell informasjon som gjeld for alle kommunar i Noreg, til dømes frå Skatteetaten. Men det er ikkje alt ho kan svara på.
Kommune-Kari er ikkje ei erstatning for saksbehandlarane, og kan ikkje gje informasjon i konkrete saker. Det er ingen som ser kva spørsmål du stiller til Kommune-Kari, og samtalane vert heller ikkje lagra. Om du sjølv vil sletta chatten i etterkant, er det også mogleg.
Kommunen kan ta ut statistikk på til dømes kva type spørsmål som kjem inn, men vi veit ikkje kven som spør.
For Austevoll kommune er det viktig at de gir tilbakemeldingar om feil og manglar når de brukar Kommune-Kari. Bruk tommel opp og tommel ned og skriv kommentar. Alle tilbakemeldingar er anonyme og blir lese. Vi prøver å gje gode og betre svar så raskt som mogleg.
Så langt har kommunen fått få tilbakemeldingar på den nye chatboten. Kommunen har tru på at dette skal bli ei teneste austevollingane vil ha glede og nytte av.
Vi blir meir og meir vane med digitale løysingar. Det å få hjelp med å finna kommunal informasjon når som helst på døgnet og i helgene, vil nok vera eit pluss for mange. 40-50 % av førespurnadene blir sende inn utanom opningstida.
Per i dag er det rundt hundre kommunar som nyttar Kommune-Kari, og ho svarer på nærmare 80 000 samtalar i månaden. Ho er også representert i Sverige, Danmark, Finland og Tyskland.
Her kan du laste ned Kommune-Kari som app tilpassa Austevoll.
At Kommune-Kari lærer for kvart spørsmål, vert tydeleg om ein ser nokre år tilbake i tid. Ein professor i informatikk ved Universitetet i Bergen meinte i 2018 at chatboten svara feil og upresist så ofte at han var uforsvarleg å bruka.
Blant spørsmåla professoren stilte Kari var dette:
«Kan dere slå plenen til en dame på 82?». Roboten, som vart trigga av ordet «slå», trudde det dreidde seg om vald eller overgrep og viste til krisesenteret.
Om ein stiller det same spørsmålet til Austevoll si Kommune-Kari i dag, svarer ho heilt korrekt at dette er noko frivilligsentralen kanskje kan hjelpa med.