Vil du bli forliksrådsmedlem?
No kan du melde di interesse innan 25. april 2024.
Publisert 28.02.2024 11.13
Sist endra 05.04.2024 08.36
Kommunestyret skal innan 15. oktober velje nytt forliksråd for perioden 2025-2028.
Dette er eit viktig verv og det er ei tillitserklæring å bli vald.
Det vil bli føretatt vandelskontroll av dei som melder si interesse.
Trykk på denne lenkja for å melde di interesse og fylle ut skjema
Digitalisering innan sivile rettspleie vil få stor betydning for forliksrådet. Det vil derfor vere ein stor fordel om forliksrådsmedlemmene har god digital kompetanse.
Å vere forliksrådmedlem er ei viktig og krevjande oppgåve. Derfor må alle ein som forliksrådsmedlem vere eigna til oppgåva.
Med å vere eigna til oppgåva betyr å kunne
- følgje meklingar i møte
- forstå problemstillingane i ei sak
- ta stiling til problemstillingane i ei sak
- gi uttrykk for si meining
- forstå tydninga av å følgje opp innkallingar
- opptre i tråd med reglar og god møteskikk
Sjølv om det er eit ønske om eit mangfald av forliksrådmedlemmar stiller domstollova visse krav til kven som kan veljast til medlem i forliksrådet.
Medlemmar av forliksrådet må vere
- over 25 år og under 70 år ved starten av perioden
- norske statsborgarar
- beherske norsk godt, både skriftleg om munnleg
Desse kan ikkje veljast til forliksrådsmedlem:
- Personar som er idømt fengsel utan vilkår i meir enn eitt år, forvaring, tvungent psykisk helsevern eller tvungen omsorg, er varig utelukka frå vervet som forliksrådsmedlem.
- Personar som er idømt fengsel utan vilkår i inntil eitt år er utelukka i 15 år, rekna frå når dommen blei rettskraftig.
- Personar som er idømt fengselsstraff med vilkår, uansett straffa si lengde er utelukka i 10 år, rekna frå når dommen blei rettskraftig.
- Personar som har fått bøtestraff for lovbrot med en strafferamme på meir enn eitt år vert utelukka i 10 år. Dette reknast frå då bota blei vedtatt eller dommen blei rettskraftig. Forenkla førelegg omfattast ikkje.
- Personar som har fått påtalefråfall med vilkår og domsutsetjing, dersom det straffbare forholdet har ei strafferamme på meir enn eitt år. Utelating gjeld i 10 år (domsutsetjing betyr at retten har avsagt dom på straffeskuld, men har unnlate å bli dømt til straff).
- Personar som er idømt samfunnsstraff blir utelukka i 15 år. Tidspunktet blir rekna frå då dommen blei rettskraftig viss den subsidiære fengselsstraffa er mindre enn eitt år. Personar som er idømt en subsidiær fengselsstraff på meir enn eitt år, er utelukka for alltid.
Nokre yrkesgrupper kan ikkje veljast:
- stortingsrepresentantar og vararepresentantar
- statssekretærar, statsrådane sin personlege politiske rådgjevar og tilsette ved statsministeren sitt kontor
- fylkesmenn og assisterande fylkesmenn
- utnemnte og konstituerte dommarar og tilsette ved domstolane
- tilsette i påtalemyndigheitene, politiet og kriminalomsorga
- tilsette i Justisdepartementet, Politidirektoratet og Domstoladministrasjonen (inkludert styret)
- tilsette og studentar ved Politihøgskulen og Fengselsskulen
- praktiserande advokatar og advokatfullmektig
- kommunen sin administrasjonssjef og kommunale tenestemenn som tar direkte del i førebuinga eller gjennomføringa av valet
Forliksrådsmedlemmar er dommarar. Politiet er sekretariatet til forliksrådet.
Alle kommunar skal ha eit forliksråd med tre faste medlemmar og tre varamedlemmar. Både kvinner og menn skal vere representerte blant dei faste medlemmane og varamedlemmane. Den kommunestyret vedtek skal stå øvst på lista over medlemmar, blir formann/leiar for forliksrådet.
Har formann/leiar forfall til eit møte, skal nummerorden kommunestyret har valde medlemmane i, styra kven som skal vere formann/leiar i møtet.
Forliksrådet er det lågaste leddet i rettssystemet for sivile saker og er ein meklingsinstitusjon med avgrensa domsmynde. Hovudoppgåva til forliksrådet er å leggje til rette for at partane ved mekling eller dom får løyst saka enkelt, hurtig og billig. Eit rettsmøte i forliksrådet er mindre formelt og mindre omfattande enn eit rettsmøte i dei andre domstolane.
Ei sivil sak er ein konflikt mellom to eller fleire parter om kven som har lova på si side. Som regel blir alle sivile saker handsama i forliksrådet. Dersom saka ikkje blir avgjort i forliksrådet, eller viss ein av partane ikkje er nøgd med resultatet, kan saka gå vidare til tingretten.
Hovudreglane om handsaming i forliksrådet går fram av kapittel 6 i Lov om mekling og rettargang i sivile saker (tvisteloven).
Meir informasjon om forliksrådet.