Alle elevar har rett til eit trygt og godt skulemiljø. Austevollskulen skal vera fri for alle former for krenkande åtferd, og skulemiljøet skal verka positivt på elevane si helse, trivsel og læring. I tillegg skal austevollskulen læra barn og unge til å meistra livet og bli ein deltakar i samfunns- og arbeidsliv.
Elevane i Austevoll skal
- oppleva læringsmiljøet som trygt og aksepterande for ulikskapar
- vera trygge for at vaksne vil dei vel, ser dei og følgjer med
- oppleva tilhøyre og vennskap
Alle elevar i austevollskulen skal møta kompetente vaksne på skulen. Alle elevar og føresette skal oppleva å bli teken på alvor når dei vender seg til skulen med ei bekymring om skulemiljø.
Krenkingar er ord eller handlingar som barn og unge opplever som krenkande for integriteten sin, eller som gjer at dei kjenner seg ekskludert frå eit fellesskap.
Krenkingar vert mobbing når åtferda er gjenteken negativ eller vondsinna, og kjem frå ein eller fleire retta mot ein som har vanskeleg for å forsvara seg. Gjenteken erting på ein ubehageleg eller sårande måte er også mobbing.
Det er mobbing når:
- nokon vert utsett for negative handingar frå ein eller fleire
- hendingar pågår over tid
- det er ubalanse eller ujamt styrketilhøve mellom den som plagar og den som vert plaga
- Meld frå til kontaktlærar så fort som mogleg og be om tiltak. Du skal bli teken på alvor når du tek kontakt
- Rektor skal snarast mogleg undersøkja saka og laga ein tiltaksplan slik at barnet ditt skal få oppfyllt rettane sine
- Skulen skal lytta til både kva du og barnet ditt meiner
- Du kan klaga til fylkesmannen dersom barnet ditt ikkje får det betre. Du må ha teke opp saka med rektor før du klagar
Du finn meir informasjon på Utdanningsdirektoratet si side.
Som forelder er du den viktigaste ressursen for læringa og utviklinga til barnet ditt. Du kan også vera ein viktig ressurs for andre barn.
- Hels på alle du møter på skulen
- Snakk positivt om andre sine barn og andre foreldre
- Gjer ein innsats for å bli kjent med vaksne og barn på skulen
- Følg opp det som blir bestemt
- Engasjer deg i å skapa eit godt miljø
- Ver oppteken av at alle er med
- Skap rom for å heia på fleire barn enn berre ditt eige