Austevoll kommune har hatt ein god og grundig prosess som har leia fram til ei einstemmig innstilling. Det var gode søkjarar til stillinga og me har vurdert fleire godt kvalifiserte kandidatar.  Me i tilsetjingsnemnda er særs godt nøgd med valet av Hogne Haugsdal som innstilt kommunedirektør, seier ordførar Bente Kari Sletten Taranger.
 

Hogne Haugsdal er i dag kommunalsjef for samfunnsutvikling i Alver kommune, og han har tidlegare vore assisterande rådmann og næringssjef i Lindås kommune. Haugsdal er også godt kjend med den maritime næringa frå tida som dagleg leiar i Maritimt Forum Bergensregionen. Hogne Haugsdal er 48 år, gift og har 3 barn. Han er busett på Flatøy i Alver kommune og har utdanning innan kommunikasjon og media. 

- Eg er glad og stolt over tilsetjingsnemnda si innstilling. Eg gler meg til å bli kjend med organisasjonen og Austevoll-samfunnet, og eg er audmjuk i forhold til å gå inn i rolla. Austevoll er ein spennande kommune med gode moglegheiter for vekst og utvikling, både for samfunnet og organisasjonen. Det utviklingsarbeidet ønskjer eg å bidra aktivt til. Men først skal innstillinga handsamast av kommunestyret, seier Hogne Haugsdal. 
 

Hogne Haugsdal Privat